نشرت بطلة العرب وإبنة نادي جمنة للرماية بالقوس والسهم رحاب الوليد في تدوينة لها على صفحتها في الفايسبوك تسنكر وتنتقد فيها أسلوب تكريم أبطال الجمعية الذي حصل أول أمس الخميس 13 جويلية 2017 في مقر الولاية.و

وفيما يلي نص التدوينة:

ههههه و كيما قالتها احد النسوة “تكريم الهانه و رڨود الجبانه.. كردونه يا بنيتي كردونه”

وقع تكريمنا على الساعه 12 و تعرفو نهار شنوا اليوم في ولاية قبلي لا علينا ههه و لي كان مشرف عليه الوالي و المندوبية و معتمد قبلي الجنوبيه و بعض المسؤولين لم اتعرف عليهم و كيما العاده كان تكريم مخزي و يحشم صراحة.. و لو كان جيت ندري عليه شهاده و الله ما نمشي لأني لمدت منهم كدس و ما فادوني بشي الشهايد هذوما سوي منهم او من الوزارة او غيره من السلط المعنيه نفس الشي و في الاخير كيف حبيت نتكلم على حقي وحق نادي متاعي اولا يقولولي لا مش مسموح اليوم و مش وقته و هاك اللغه يعني مندوب الشباب و الرياضه و والي قبلي جاي يكرم في #ابطاااااااااااااااااااااااااااااال بكردونه و يروح و يقول هاني كرمتهم يعني حت بش يقلك ماذابينا نسمعوكم شنوا تحبو و شنوا لازمكم و مستعدين نلبولكم طلباتكم على ما نقدرو عللقل .. يقلك مش مسمووووح و واولياء جايين و فرحانين لصغارهم في لخر شطرهم يروحو من غير حت شي حت بكردونا لا قال شنوا كان الاواءل و بلا بلا ما حاجتيش باها شهادتكم شدوها عندكم.. شنوا ماهي بش تحط علاها الغبرا كي خواتها يعني كان جيتو قدمتولي معاها معروف او خدمه و هذا ماهوش بمزية حت حد بش نفرح باها شهاده؟؟ ؟؟؟؟؟ و الا اسمي والا يتاجرو بيه هانا هانا كرمناهم يا سيدي ريتوه التكريم هذا بش يبقا نقطة سودا في تاريخكم تقدم فيا كبطله و الابتسامه العريضه على الوجه مننكرش و منشككش اذا هو فرحان بيا و الا لا لكن كمسؤول شقدمت للبطل هذا و للنادي هذا كواجب من واجباتك.. طبعا حت شي نادي متاعنا 30 الف دينار صرف السني هذا كان مش اكثر و الكلهم من الاولياء و ناس لي واقفا لجمنة.. وينكم انتم هني عاونتوناش حت بوسيلة تنقل بش نواكبو البطولة؟ عاونتوناش بماتريال؟ وفرت لنا مكان نترانو فيه؟؟؟ هذا كل و ما تكلمتش عل الوعود لي قدمتوهالي و قدمتوها للنادي و لي بقت وعود وما صار منها شي كيف قاعة الرماية لي وعدت باها الوزارة بربي وينها؟؟؟؟

عندنا ابطال السني مستوى متاعهم وخر بسبب انه قوسهم تكسر كيما محمد امين عزوز Med Amin Azzouz و كيما نبيل بن رمضان و انس عزوز و تلقا بطلة تونس قبل البطولة بنهارين تحوم على قوس ترمي بيه نهار البطوله و تبكي و خايفا لا ما تجيبش ميدالية كيما حسناء بلحسن… و الا هويده بوغرارة و عبلة الرحال و محمد علي الرحال و هاشم الرحال و غيرهم لي قررو يعتزلو الرماية خاطر اغلبهم اهلهم مش قادرين عالمصاريف و هذا نعانو منه اللاعبين الكل و الماتريال ما فماش شافوش عبد الرحمان الرحال Abderahmen Rahal الي شررف تونس في عدة تتويجات و اعتزل السني و ما شاركش خاطر ما عنداش اسهم و معاش خالط على حت شي و كاي انسان مسؤوليات كبيره وراه و الا الشخصية الاكثر شهرة و اكثر واحد متميز فينا محمد حماد Mohammed Hammed ، ياخي محمد حماد جاب محمد حماد عمل و تحصل و كذا هكاك هو؟؟؟

تعالو شوفو اللاعب هذا شنوا يعاني يعني انسان بقدراته مفروض يكون عنده ماتريال بروووفيسونال 100% مش قوس عادي يعلم ربي كفاش شراه و جابه و لا من حاس بيه يعني انسان كيف هذا عنده القدرة ينافس ابطال العالم … و زيد على هذا لا مرة لا ثنين توقع بطوله عربيه او عالمية او افريقية و غيره منمشوش عل خاطر الفلوس ما فمش و راهو كي نقول فلوس راهو مش ملاين زرقا يعني يقدرو عليه المسؤولين هذوما خلينا عاد من ماتريال الجمعيه لي هو فاضح اقواس لوح اغلبها مكسرا و اسهم بحاله مزرية و اهداف رماية لا علاقة و تجردت و معاش تصلح وصلنا حت نرمو عالڨرط و يجي شكون يسرڨه!!!!! و شوفو هذا الكل و روحنا بتتويجات الكل و سوى بالكأس و الا بالقاب البطولات هما ويييين هني حني اغلبنا ضمن المنتخب و عندنا رماة كيما لي سميتهم متميزين و نأكد على رماة صنف الاكابر محمد حماد و بلقاسم المكي و نبيل رمضان و غيرهم و هاني مانيش بش نذكر اسمي لكن انتم تعرفو من غير ما نسمي ..

حسسونا الي حني تابعين منتخب و الا راكم مهتمين بينا وخي وينه الدعم المادي الى متى و الواحد بش يبقا يعاني و الا نبقو محقورين حني درا غالطين كي نتكلمو غلى حقنا ت مانا نلعبو ب اسم تونس و باسم قبلي يا ناس ماناش برانية!!!! وقلوبنا تعبت و حني نسمعو كان في الوعود و الوعود ثم الوعود و التطبيق ما فمش يااااااا وزارة الشباب و الرياضة يا جامعة يا مندوبيه يا والي يا مسؤولين رانا ابطال و رياضيين طالبين الدعم و هذا حقنا بش نعاونو رواحنا مش طمع ياخي حرام كان نتكلمو على حقنا و تخدمو خدمتكم كما ينبغي اني هاني حكيت و مازلت بش نحكي و بش ندافع على حقي و مانيش بش نأيس حت لين ناخذ حقي كامل و كي نقول حق مش حقي وحدي حقي حق النادي الكل و اذا كان لزم الامر نعتصم و نضرب و كل شي و هذا كلام بالمنجد و انتم و ضميركم المهني…. يزينا من الحڨرة

By

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *